БИШКЕК, 12-дек. — Sputnik. Укук коргоо органдары УКМКнын Жалал-Абад облусу боюнча кызматкерлери менен биргеликте ыкчам тергөө иш-чарасын жүргүзүшкөн. Козголгон кылмыш иштин алкагында Жалал-Абад облусунда бир нече жарандын үйүндө тинтүү жүргүзүлүп, натыйжада экстремисттик маанайдагы адабияттар табылды. Бул тууралуу ИИМден билдиришти.
Маалыматка караганда, 43 жаштагы жаранга тийиштүү Daewoo Lacetti үлгүсүндөгү унаанын ичинен экстремисттик маанайдагы китептер менен баракчалар табылган.
Ошондой эле беш жарандын үйүндө санкциялык тинтүү жүргүзүлүп, ишмердүүлүгүнө тыюу салынган экстремисттик уюмдардын китептери, брошюралар, аудио жана видео материалдар алынган.
Негизги шектүүлөрдүн бири болгон 32 жаштагы жарандын үйүнөн экстремисттик маанайдагы китептер, баракчалар, блокнот, флеш-карта, аудио жана видео материалдар табылган. Мындан тышкары, мыйзамсыз сакталган жардыруучу каражаттар, РГД-5 гранатасы, бет кап, кол кап, Жалал-Абад облусунун картасы, жарылуучу каражаттарды даярдоо инструкциясы алынган.
Учурда аталган факты боюнча Кылмыш жаза кодексинин бир нече беренелери боюнча кылмыш иши козголду. Анын алкагында тиешелүү экспертизалар дайындалып, тергөө иши башталды.
ИИМ укук коргоо органдарынын кызматкерлери менен биргеликте мыйзам бузууларды аныктоо максатында ыкчам иш-чараларды жүргүзүп жатат.
