БИШКЕК, 20-мар. — Sputnik. Баткен облусунда милициянын подполковниги өз унаасы менен 20 килограммга жакын нашаа алып бараткан жеринен кармалды. Бул туурасында ИИМдин маалымат кызматынан кабарлашты.
19-мартта Баңгизаттарды мыйзамсыз жүгүртүүгө каршы күрөшүү кызматы Криминалдык милиция, Ички иликтөө кызматы жана Жол кыймылы коопсуздугун камсыздоо башкармалыгы менен биргеликте атайын операция жүргүзгөн.
"Ош — Баткен жолунда Honda Inspire үлгүсүндөгү унаа токтотулган. Ал машинаны Баңгизаттарды мыйзамсыз жүгүртүүгө каршы күрөшүү кызматынын Баткен облусу боюнча башкармалыгынын ага опер кызматкери, милициянын подполковниги А.А. башкарып бара жаткан. Тинтүү учурунда унаанын ичинен 16 баштыкка салынып таңгакталган 19 килограмм 650 грамм нашаа табылды. Анын кызматтык күбөлүгү ошол жерден тартып алынды", — деп айтылат маалыматта.
Кармалган подполковник Ош облустук милициясынын убактылуу кармоочу жайына киргизилди. Учурда ыкчам-тергөө иштери жүргүзүлүп, аталган кылмышка тиешеси барлар аныкталууда.
