Бишкек шаарындагы Эски аянттын жанында жайгашкан Михаил Фрунзенин мемориалдык үй-музейи Кыргызстандагы эң эски имараттардын бири. Өлкөбүздүн XIX кылымдын аягынан тарта XX кылымдын ортосуна чейинки тарыхын камтыган музей жумасына алты күн иштеп, дүйшөмбү күнү гана бек болот. Эртең мененки 9.30дан 17.30га чейин каалоочулар тарыхый экспонаттар менен тааныша алат. Кирүү баасы 50 сом болсо, анын ичине экспонаттар менен тааныштырган гид да камтылган.
Үй-музейдин кызматкери Дамира Стамкулованын айтымында, тарыхый имарат 1925-жылы ачылган.
"Колбашчы, революционер Михаил Фрунзе 1885-жылы 2-февралда Пишпек шаарында туулган. Кесиби боюнча фельдшер болгон атасы Василий Фрунзе бул үйдү 1879-жылы курган экен. Ошондо бул жердин 138 жылдык тарыхы бар. Михаил Фрунзе ушул үйдө чоңоюп, кошуна кыргыздын балдары менен ойночу экен. Ал кыргызчаны мыкты билген. Каза болгондон кийин балалыгы өткөн бул үйдү музей кылуу чечими чыккан", — деди Стамкулова.
Ал эми азыркы үч кабаттуу комплекс 1967-жылы Фрунзенин үй-музейинин үстүнө курулган.
Музейдин эң негизги бөлүмү болгон Фрунзенин үйү биринчи кабатта жайгашкан. Кызматкерлердин айтымында, элдин көбү ушул үйдү көргөнү келет. Бир кабаттуу үйдүн кире беришинде жүз жылдан ашуун убакыттан бери сакталып келе жаткан кол жуугуч, медициналык кийимдер жана куралдар жайгашкан. Андан кийин ашкана бар. Ашканада очок, самоор, идиш-аяк коюлган текче, ал эми терезесинде кумаралар турат.
Кийинкиси — конок бөлмө. Ортосундагы стол жана отургучтар бар, дубалда картина жана саат илинген. Бөлмөнүн төрт бурчунда үй буюмдары коюлган текчелер турат.
Жалпысынан эки оңдоодон өткөн үйдүн ичиндеги буюмдардын баары жүз жылдан ашык убакыттан бери сакталып турат.
Музейдин экинчи кабатында Фрунзенин атын алган окуу жайлардын, аскер академияларынын сүрөттөрү бар. Ошондой эле Улуу Ата Мекендик согуш убагындагы аскерий техника жана куралдар, жоокер кийимери көрсөтүүгө коюлган. Аны менен бирге эле Фрунзенин туугандары жана үй-бүлөсүнүн сүрөттөрүн көрүүгө болот.
Үчүнчү кабатта Михаил Фрунзе тууралуу материалдар топтолгон. Колбашчы колдонгон турмуштук буюмдар, ошол кездеги гезит беттери, аскерий операциялардын пландары турат. Фрунзенин бала чагынан улгайган убагына чейинки тулку боюн көрсөткөн эстеликтерди да ушул кабаттан көрүүгө болот. Ошондой эле ата-энеси жана бир туугандары тууралуу маалыматтар, атасынын медициналык куралдары да жайгашкан.
Стамкулованын айтымында, музейди көрүүгө келген адамдардын саны анчалык көп эмес.
Михаил Фрунзе Октябрь көтөрүлүшүнөн кийин, жарандык согуш мезгилинде Чыгыш фронтун, Түркстан, Түштүк фронтторун жетектеген. 1924-жылы СССР аскер жана деңиз министри болуп дайындалган. 1925-жылы операция учурунда каза тапкан.
