Турнирде жалпысынан 19 беттеш болсо, анын бешөөсүндө чемпиондук кур ойнотулду.
Дүйшөбай Бактыбек уулу япониялык атаандашы Ямагучирио Ройду төртүнчү раундда муунтуу ыкмасы менен жер каратып, WEF Global уюмундагы чемпиондук курун коргоп калды.
Өзбекстандык мушкер Нурсултан Рузибоев дагы бразилиялык атаандашы Маргос Соузаны техникалык нокаут менен утуп, наамын сактады.
Эки кыргызстандык мушкер — Санжар Ажибаев жана Абдулгаджи Газиев алтын кур үчүн беттешип, Ажибаев жеңүүчү аталды.
Ошондой эле кыргызстандык Байзак Ракыев менен япониялык Ю Фужумаки кармашкан. Кур конокторго буюрду.
Рейтинг үчүн кызыктуу беттештердин бирин "Тайсон" каймана аты менен таанымал Канат Келдибеков тартуулады.
Кечени белгилүү америкалык ринг-анонсер Ленне Хардт менен кыргызстандык Кайрат Мусаев тейледи.
Турнирге Орто Азиянын, Япониянын, Монголиянын, Бразилиянын жана Россиянын спортчулары катышты.
