БИШКЕК, 25-ноя. — Sputnik. Кыргызстандык ММА мушкери Тилек Жээнбеков кезектеги кармашы алган жаракатына байланыштуу үзгүлтүккө учурап, Кыргызстанга дарылануу үчүн кайтып келгенин Instagram баракчасы аркылуу билдирди.
Эске сала кетсек, Жээнбеков 17-декабрда Кореянын Сеул шаарында өтө турчу Angels Fighting спорттук лигасынын турниринде чемпиондук наамын коргомок. Ал кайрылууда күйөрмандарынан кечирим сураган.
"Ассалом алейкум достор. Кореядагы көптөн бери күткөн беттешим болбой калды. Спортто ар кандай жагдайлар болот экен. Тиземди кокустатып алдым. Келечек алдыда. Жакшы пландарым бар", — деп бутуна муз баскан видеону жүктөгөн.
Ал эми Жээнбековдун машыктыруучусу Кенжебек Чекиров ал UFC мушкери Стип Миочич менен болгон спаррингде жаракат алганын жазган.
"Тилек дарылануу үчүн убактылуу Кыргызстанга учуп келди. Баарыңар эле билсеңер керек, Америкада медициналык кызмат арзан эмес. Ал UFC мушкери Стип Миочич менен машыгып жатып жаракат алды ", — деди Чекиров.
Ошондой эле машыктыруучу Жээнбековдун визасы ачык экендигин, ден соолугу калыбына келгенден кийин кайра АКШга учуп кетерин кошумчалаган.
Мушкер Тилек Жээнбеков октябрдын башында карьерасына карап үй-бүлөсү менен Америкага көчүп барып, дүйнөлүк ММА мушкерлери машыккан ири залда тарбияланып жаткан.
Ал жактан UFC жылдызы Стип Миочич менен таанышканын билдирип, чогуу машыккан сүрөтүн да жүктөгөн.
Жээнбеков — оор салмактагы таанымал ММА мушкерлердин бири. Быйыл үч ирет мыкты беттеш тартуулады. 6-мартта WEF Global турниринин алкагында украиналык Юрий Проценкону, 14-майда швециялык Малик Тамбени утуп алган. Ал эми 23-июлда Кореядагы Angels Fighting спорттук лигасынын алтын курун тагынган. Жээнбеков атаандаштарынын бардыгын техникалык нокаут менен жер караткан.
29 жашта. Үй-бүлөлүү, эки уулдун атасы.
