Туйгунаалы Абдраимовдун ордуна жаңы жетекчи дайындалды

БИШКЕК, 11-июн. — Sputnik. Өкмөттүн Чүй облусундагы ыйгарым укуктуу өкүлү болуп Алтынбек Намазалиев дайындалды. Бул туурасында өкмөттүн маалымат кызматынан билдиришти.

Тийиштүү буйрукка премьер-министр Мухаммедкалый Абылгазиев кол койгон. Буга чейин Намазалиев Аламүдүн районунун акими болуп иштеп жаткан.

Борбордук аппараттын жамаатына облустун жаңы башчысын бүгүн биринчи вице-премьер Кубатбек Боронов тааныштырганы айтылат.

Эске салсак, 5-июнь күнү Сокулуктун Орок айылында жаштар арасында уруш чыгып кетип, милиция 32 кишини кармаган. Абал менен жеринен таанышуу үчүн барган өкмөттүн Чүй облусундагы өкүлү Туйгунаалы Абдраимов ага суроо узаткан журналист кызга: "Кебетеңиз жакпайт, ошон үчүн сурооңузга жооп бербейм",- деп каткырган боюнча басып кеткен.

Эртеси күнү облустук администрациянын имаратынын алдына журналисттердин жоон тобу барган. Абдраимов алар менен көпкө чейин жолукпай жатып акыры макул болгон. Ал ЖМК өкүлдөрүнүн суроолоруна жооп берип жатып, кемсинткен журналисттен кечирим сурабай турганын жана ал кылыгы үчүн өкүнбөй турганын айткан.

Көп өтпөй премьер-министр Мухаммедкалый Абылгазиев Чүй облусунун башчысынын аракети өкмөткө көлөкө түшүргөнүн билдирген. Кечээ, 10-июнда, аны кызматтан алды.