БИШКЕК, 18-июл. — Sputnik. Эл "ишин токтотсун" деп талап кылып жаткан Zhong Ji Mining Company кен иштетүү компаниясы мамлекетке жана жергиликтүү элге социалдык жардам катары канча каражат сарптагандыгы айтылды. Бул туурасында Өнөр жай, энергетика жана жер казынасын пайдалануу боюнча мамлекеттик комитетинин төрагасы Эмил Осмонбетов журналисттерге айтып берди.
"Аталган ишкана 2012-2018-жылдары чалгындоо иштерин жүргүздү. Миң-Булак айылына социалдык жардам катары 40 миллион сом бөлгөн. Аны эл айыл чарба техникаларын жаңыртып алууга жумшаган. Ал эми Эмгекчил айылына 2014-2018-жылдары 12 миллион сом берилип, анын бир бөлүгүнө каналдары оңдолгон. Калганы айыл чарба шаймандарын сатып алууга корогон", — деди жетекчи.
Ал эми мамлекеттик бюджетке ошол аралыкта компаниядан 211,9 миллион сом түшкөн. Мындан тышкары, бонус катары 49,3 миллион сом, лицензияны кармап тургандыгы үчүн 8 миллион сом бергени айтылды.
Солтон-Сары кенин чалгындоо жана иштетүүгө биринчи лицензияны 2008-жылы алган. Үч жылдан соң, тагыраагы, 2012-жылы Zhong Ji Mining Company ЖЧКсына кендин үч тилкесин тең — Бучук, Ак-Таш жана Алтын-Төрдү чалгындоо жана иштетүүгө лицензия берилип, ушул жылдардан тарта активдүү иштей баштаган.
Быйылкы жылдын июль айынын биринчи жарымында компания иш алып барган Солтон-Сары жайлоосунда жергиликтүү элдин кой-козусу кырылып, мындан улам тургундар буга кендеги жардыруу иштери себепкер деп айыптап чыккан. Ал тургай компания мыйзам бузууларга барып жатканын айтып, бийликке кайрылышкан.
Учурда пландан тышкары текшерүү иштерин жүргүзүү үчүн Экологиялык жана техникалык коопсуздук боюнча мамлекеттик инспекциясы Экономика министрлигинин уруксатын күтүп жатат.
