БИШКЕК, 7-авг. — Sputnik. Кыргызстандын Тышкы иштер министрлиги Белоруссиянын КРдеги элчисинин убактылуу милдетин аткаруучусу Сергей Ивановду чакырып нота тапшырды. Бул туурасында аталган ведомствонун маалымат кызматы билдирди.
Белгилей кетсек, буга чейин ЖМКларга Белоруссиянын президенти Александар Лукашенко Кыргызстандын мурдагы президенти Курманбек Бакиевди туулган күнү менен куттуктап, белек тапшырып жаткан видеосу жарыяланган.
Нотанын берилишине Белоруссиянын президентинин расмий сайтына президент Александр Лукашенконун Курманбек Бакиев менен жолукканы туурасында жарыяланган маалымат себеп болгон.
"ТИМ Кыргызстанда соттолгон адам менен президент расмий түрдө жолугуп, ачык мамиле түзүп жатканына нааразычылыгын билдирип нота тапшырды. Кыргыз тарап Белоруссиянын бийлигин бул кырдаал боюнча кадамдарын өзгөртүп, эки тараптуу кызматташууну илгерилетүү үчүн кылдат мамиле жасоого чакырды", — деп айтылат маалыматта.
Кыргыз тарап бул жолугушууда Кыргыз Республикасынын мамлекеттик символикаларын колдонуу жана кыргыз-беларусь достугун белгилөө такыр туура эмес деп эсептейт. Ошондой эле анын тамыры эки мамлекеттин кызматташтык жана достук мамилесинин принциптерине дал келбей турганын белгилеген.
