БИШКЕК, 28-авг. — Sputnik. Экономика министрлигинде да бөлүм башчыны "министрдин орун басары" рангы менен Кытайга жөнөтүп жатышат. Бул тууралуу айыл чарба, тамак-аш өнөр жайы жана мелиорация министри Эркинбек Чодуев Sputnik Кыргызстан радиосуна маек берип жатып билдирди.
Эске салсак, Айыл чарба министрлиги экспорт бөлүмүнүн башчысы Анаркүл Беккулиеваны министрдин орун басары рангы менен "XXI кылымдагы Деңиз Жибек Жолу" деп аталган Кытайдагы эл аралык жарманкеге жөнөтүүгө белсенген. Бул жагдайды Башкы прокуратура текшерип, эки мыйзам бузуу аныкталып, премьер-министрдин атына күнөөлүү тараптарды дисциплинардык жоопкерчиликке тартуу боюнча кат жөнөткөн.
Чодуев маек учурунда ушундай эле кырдаал башка министрликтерде дагы кайталанса көңүл бурулбай жатканына таң калган.
"Анара Беккулиева эч кандай рангга ээ эмес. Комиссиянын иликтөөсүндө менин эки орун басарым катка кол койгону белгилүү болду. Алар Тышкы иштер министрлиги аркылуу иштеши керек эле, бирок уюштуруу комитетине түз жиберип коюшкан. 23-августтан баштап Гуандун шаарына кетмек, анысы билинип калгандан кийин барган жок. Мени таң калтырганы, социалдык тармактарда жалгыз гана Айыл чарба министрлигин талкуулап жатышат. Башка министрликтер деле өзүнүн кызматкерлеринин рангын чоңойтуп жөнөтүп жатышат. Анара Беккулиева менен чогуу Экономика министрлигинен да барышмак. Эмнегедир Айыл чарба министрлигине чабуул болду", — деп айткан Чодуев.
Деген менен экономика министри Санжар Муканбетов айыл чарба министринин айткандарын төгүнгө чыгарды.
Белгилей кетсек, Кытайда жыл сайын өтүүчү "XXI кылымдагы Деңиз Жибек Жолу" эл аралык жарманкеге катышуу үчүн айыл чарба министринин орун басары рангындагы кызматкерге чакыруу келген. Жол кире, тамак-аш жана башка чыгымдарды чакырган тарап төлөп берет. Аталган жарманке 23-26-августта өтмөк.
