БИШКЕК, 27-фев. — Sputnik. Өлкөдө май куйган 345 станцияга башкаруунун автоматташтырылган системасы орнотулду. Бул тууралуу Мамлекеттик салык кызматынан кабарлашты.
Автоматташтырылган электрондук системанын өзгөчөлүгү — кардар контролдук-кассалык машинадан төлөнгөн суммага кассалык чек албай туруп май куя албайт. Чек албаса станциянын май куюу колонкасынын май куюу жөнүндө сигналы иштебейт. Система май куюу жайынан бензинди берүү учурун Салык кызматынын серверине да көрсөтүп турат.
"Өлкөдө жалпы жонунан 974 май куюучу жай бар. Бишкек боюнча май куйган 82 станция, Ош шаарында 11, Чүйдө 86, Ысык-Көл облусунда 39, Нарында 13, Ош облусу боюнча 28, Жалал-Абадда 66, Баткен облусунда 10 май куйган жайга автоматташтырылган система орнотулду", — деп жазылат маалыматта.
Салык кызматы ушул жылдын 1-июлунан тарта өлкөдөгү бардык май куюу жайлары башкаруунун автоматташтырылган системасын колдонуп баштай турганын кошумчалады.
