БИШКЕК, 7-апр. — Sputnik. Президент Сооробай Жээнбеков Абу-Дабинин мураскор ханзаадасы, Бириккен Араб Эмираттарынын Куралдуу күчтөрүнүн Жогорку башкы командачысынын орун басары Мухаммед бин Зайед аль-Нахайян менен телефон аркылуу сүйлөштү. Бул тууралуу мамлекет башчынын маалымат кызматынан билдиришти.
Тараптар кызматташтыктын актуалдуу маселелерин, ошондой эле коронавирус инфекциясынын жайылышына каршы чараларды талкуулашкан.
Абу-Дабинин мураскор ханзаадасы кыргыз тарапка аталган илдет менен күрөшүүдө колдоо көрсөтө тургандыгын билдирген. Ошондой эле ал эмират тарап Кыргызстандын экологиялык таза айыл чарба азык-түлүктөрүн импорттоого кызыкдар экенин белгилеген.
