БИШКЕК, 30-май — Sputnik. Кыргызстанда жалпы массасы 18 тоннадан ашкан жүк ташуучу жана ири габариттүү автоунаалардын кыймылына убактылуу чектөө киргизилди. Бул тууралуу Транспорт жана жол министрлигинин маалымат кызматы кабарлады.
Ага ылайык, чектөө чаралары 1-июндан 1-сентябрга чейин, күн сайын 10:00дөн 20:00гө дейре күчүндө болмокчу.
"Чектөө чаралары эл колдонгон жолдун көпкө чейин сакталуусун камсыз кылуу максатында киргизилди", — деп айтылат маалыматта.
Буйрук төмөнкү автотранспорт каражаттарынын түрлөрүнө тиешелүү эмес:
- Жүргүнчү ташыгандарга;
- Гумжардам жеткирген кызматты аткаргандарга;
- Тиешелүү мамлекеттик органдар тарабынан атайын уруксат алган жүк ташуучу унааларга;
- Кооптуу жүктөрдү ташыгандарга;
- Транспорт жана жол министрлигинин жол түзүмдөрүнө;
- Автожолдорду салуу, реабилитация, реконструкция кылууга тиешеси бар уюмдардын унааларына.
Буйруктун аткарылышын көзөмөлдөө милдети Транспорт жана жол министрлигине, ошондой эле ИИМдин Жол кыймылынын коопсуздугун көзөмөлдөө башкы башкармалыгына жүктөлгөн.
