БИШКЕК, 9-дек. — Sputnik. Россия Кыргызстанга көптөгөн маселелер боюнча жардам берүүгө даяр. Бул туурасында КР президентинин милдетин аткарып жаткан ЖК төрагасы Талант Мамытов Россияга жасаган иш сапарынын жүрүшү тууралуу "Ала-Тоо 24" каналына маек куруп жатып билдирген.
Президенттик маалымат кызматы маекте эмнелер айтылгандыгы боюнча билдирүү таратты.
Мамытов Россия Федералдык Жыйынынын Мамлекеттик Думасынын төрагасы Вячеслав Володин менен болгон жолугушуунун жыйынтыгында жакшы натыйжалар болгондугун айткан.
Жолугушууда кыргызстандык эмгек мигранттарынын бир катар көйгөйлөрү — Россиянын Федералдык миграция кызматы тарабынан КРдин айрым жарандарынын Россияга кирүүсүнө тыюуга ("кара тизме") байланыштуу, милдеттүү медициналык камсыздандыруу полисин алуудагы кыйынчылыктар, авиакаттамдардын билеттеринин кымбаттыгы жана башкалар көтөрүлгөндүгү кабарланган.
"Мамлекет башчысынын милдетин аткарып жаткан Мамытов Вячеслав Володиндин Россия тараптын аталган маселелерди чечүүгө даярдыгын билдиргенин, тиешелүү эки тараптуу макулдашууларга кол коюу белгиленгендигин айтты", - деп билдирген маалымат кызматы.
Мамытов, андан сырткары, өлкөдөгү саясий кампания — шайлоо туурасында да айткан.
Шайлоону ачык-айкын өткөрүү боюнча чаралар көрөлүп жатканын, мамлекеттик органдарга тийиштүү тапшырмалар берилип, ал эми аларга эл аралык байкоочулар дагы байкоо жүргүзөрүн кошумчалаган.
