БИШКЕК, 11-дек. — Sputnik. Борбор калаада ушул жылдын 11 айынын ичинде 1 956 жол кырсыгы катталган. Бул 2019-жылга салыштырмалуу 393кө аз экенин шаардын Кайгуул милиция башкармалыгынын маалымат кызматы билдирди.
Ага ылайык, жол кырсыктардын айынан 2 588 адам ар кандай жаракаттарды алышкан. Бул сан былтыркы жыл менен салыштырганда 361 адамга аз. Ошондой эле быйыл кырсыктан 66 киши каза болгон. Бул сан 2019-жылга караганда 9га аз.
Жыйынтыгында быйыл жол кырсыктары 20 пайызга кыскарганы белгилүү болду. Кайгуул милициясы муну айдоочуларга жүргүзүлгөн түшүндүрүү иштеринин жыйынтыгы деп түшүндүргөн.
23-марттан 11-майга чейин жазгы карантин (өзгөчө абал) учурунда 119 жол кырсыгы катталганы кошумчаланды.
