ID-паспортту кимдер акысыз ала алышат. ММКнын билдирүүсү
18:21 09.06.2021 (Жаңыртылды: 14:26 31.10.2023)
© Sputnik / Жоомарт Ураимов
Жазылуу
ID-паспортту акысыз, жоголгон учурду кошпогондо беш категориядагы адамдар алууга укуктуу экени маалым болду.
БИШКЕК, 9-июн. — Sputnik. Кыргызстандыктардын кээ бир категориясына ID-паспортторун акысыз берүү боюнча улуттук кампания август айына чейин уланат. Бул тууралуу Мамлекеттик каттоо кызматынан кабарлашты.
"Бул кампаниянын алкагында жалпысынан 67 арыз кабыл алынды. 37 ID-паспорт колдоруна берилди. Президенттин "Калкка мамлекеттик жана муниципалдык кызмат көрсөтүүнүн жеткиликтүүлүгүн жана сапатын жакшыртуу боюнча мындан аркы чаралар жөнүндө" жарлыгын ишке ашыруунун алкагында кампания 2021-жылдын 31-августуна чейин уланат", — деп айтылган маалыматта.
ID-паспортту акысыз, жоготулган учурларды кошпогондо төмөнкү категориядагы адамдар алууга укуктуу:
- мамлекет тарабынан толук камсыздалган жана социалдык стационардык жатак мекемелеринде жашаган 16 жашка чейинки балдар;
- 18 жашка чейинки атасы да, энеси да каза болгон балдар;
- мамлекет тарабынан толук колдоого алынган жана социалдык стационардык мекемелерде жашаган бардык топтогу майыптар;
- мамлекет тарабынан камсыздалган жана социалдык стационардык мекемелерде жашаган 70 жаштан ашкан пенсионерлер;
- Улуу Ата Мекендик согуштун катышуучулары (анын ичинде Улуу Ата Мекендик согуштун майыптары, "Ленинградды коргогондугу үчүн" медалы менен сыйланган, концлагерлердин жашы жете элек туткундары) жана Баткен окуясынын катышуучулары.
