БИШКЕК, 7-авг. — Sputnik. Мындан ары айдоочуларга эл жашабаган аймактарда күндүз фараларды күйгүзбөй эле жүрүүгө уруксат берилди. Бул тууралуу Sputnik агенттигине ИИМдин Жол кыймылынын коопсуздугун камсыздоо башкы башкармалыгынан (ЖКККББ) билдиришти.
Маалыматка караганда, былтыркы жылдын башында бир катар эреже бузуулар боюнча айып пулдардын өлчөмү азайтылган. Ошол учурда эл жашабаган аймактарда күндүз фараларды күйгүзбөй жүрүү экинчи категориядагы санкциялардын катарынан алынып салынган. Тагыраак айтканда, айдоочулар мурдагыдай 3 миң сом айып төлөбөйт деп чечим кабыл алынган.
Анткен менен 127-берененин ("Жол кыймылынын эрежелерин бузуу") негизинде эл жашабаган аймакта фарасыз жүргөн айдоочулардан болбой эле 1 миң сом айып пул алынып келген.
Министрлер кабинети ушул жылдын май айында 1999-жылдын 4-августундагы “Жол кыймылынын эрежелерин жана Транспорт каражаттарын пайдаланууга уруксат берүү боюнча негизги жоболорду жана жол кыймылынын коопсуздугун камсыздоо боюнча кызмат адамдарынын милдеттерин бекитүү жөнүндө” токтомуна өзгөртүү киргизишкен.
Ага ылайык, айдоочуларды күндүз фарасын күйгүзүп жүрүүгө милдеттендирген эреже күчүн жоготкон. Бул документке ("Эреже бузуулар кодексине өзгөртүүлөрдү киргизүү жөнүндө" мыйзам) президент Садыр Жапаров 4-август күнү кол койгон.
Ошол себептүү мындан ары айдоочулар эл жашабаган аймакта күндүз фарасын күйгүзбөй жүргөн учурда айып пул төлөбөйт.
