БИШКЕК, 14-сен. — Sputnik. Коронавирустун күздөгү толкуну жайкысынан көп айырмаланбайт, бирок окуу башталгандыктан балдар көбүрөөк ооруп баштайт. Бул туурасында РИА Новости "Инвитро-Сибирь" клиникалык-диагностикалык лабораториясынын башкы дарыгери Андрей Поздняковдун айтканына таянып билдирди.
"Өткөндөгү толкундан күздөгүсү өтө деле айырмаланбайт. Бирок андан азайып кетпейт. "Дельта" штаммы ошондой эле басымдуулук кылат, балким ага жайында ооруну көбөйтүп жиберген "дельта-плюс" кошулушу мүмкүн. Албетте, жашына карабай илдетти тез кабыл алган адамдар ооруйт", — деген Поздняков.
Кыйынчылык жайкы мезгилге карата азайып кетпестигин айтты.
"Окуу жылы башталып, бала бакчалар иштей баштагандыктан балдар арасында коронавируска чалдыккандар көп болот", — деген адис.
Поздняков вакцина алгандар дагы коронавируска кабылышы мүмкүндүгүн, бирок иммунитети жокторго караганда оор өтпөй тургандыгын жана бейтаптар ооруканага жатып калбастыгын айткан.
Башкы дарыгер дагы бир ай оору көбөйбөй, абал тынчыраак болуп турарын жана бул учурда эл эмне кылышы керектиги боюнча кеңеш берген.
"Оорунун деңгээли боюнча дагы бир айга чукул тынч убакыт бар. Бул — ооругандар менен аралашып кезекке туруп убара болбой, вакцина сайдырып алууга кенен мүмкүнчүлүк бар дегендик. Препарат тартыштыгына же башка дагы көйгөйлүү кырдаалга тушугуп отурбай, алдын ала камданып, эмдөөдөн өтүү зарыл", — деп эскерткен дарыгер.
Учурда Кыргызстанда коронавирус боюнча эпидемиологиялык кырдаал акыркы үч айга салыштырмалуу турукташып калды. Бирок республикалык штаб, өкмөт жана дарыгерлер кыргызстандыктарды COVID-19га каршы вакцина алууга чакырып жатат. 14-сентябрга карата 82 киши ооруну жугузуп алып, ооруп жаткандардын ичинен эки адам кайтыш болду.
