Рахман: чет мамлекеттерде өкүлдөрүбүз дайындалды

"Жогорку Кеңештин төрагасынын алдындагы Миграция маселелери боюнча кеңешинин катчылыгы башка мамлекеттерде өз өкүлдөрүн дайындап жаткан учуру. Биринчи топтомдо 17 өлкөдөн 50 адам дайындалды. Алардын 28и Россия Федерациясынын ар кайсы аймактарынан. Алар ачык өткөрүлгөн сынак аркылуу келишти. Конкурска келип түшкөн документтерди атайын комиссия карады. Комиссиянын курамы Тышкы иштер министрлигинен, Эмгек жана социалдык өнүктүрүү министрлигинен, катчылыктан болуп жалпы беш кишиден турат. Учурда сынакты экинчи ирет өткөрүүгө камынып жатабыз. Анткени ошол эле Россиянын кээ бир аймактарынан жана башка мамлекеттерден өкүлдөр дайындалбай калган болчу. Ал жактагы мекендештерибиз байланышып, кызыгуусун билдирүүдө. Буга чейин бизде 38 өкүл иш алып барып келген. Бул ирет саны көбөйдү жана аларды тандоодо бир өзгөчөлүк кирди. Ага ылайык, эми ошол жашап жаткан мамлекетинин жараны болгон мурдагы кыргызстандыктар деле өкүл боло алат. Талаптардын негизгиси өзү өкүл боло турган аймактагы мекендештерибиздин көйгөйлөрүн жана аларды чечүү жолдору тууралуу программасы болушу керек. Мындан сырткары, резюме, сүрөт, өмүр баяны деген сыяктуу 8 пунктудан турган документтерди кошуп бизге жөнөтөт. Сынак ачык өтөт. Дайындалган өкүлдөр коомдук башталгычтагы кызматкерлердин статусунда иш алып барышат жана аларга айлык төлөнбөйт", — деди Рахман.