Ичимдик эмне үчүн жүрөккө "бычак". Адистер кесепетин санап берди
© Фото / Pexels / MART PRODUCTION
Жазылуу
Ичимдик жүрөккө кошумча күч келтирип, күчөтүлгөн режимде иштейт да, адаттагы ыргагынан эки эсе көп кан айландырууга туура келет.
БИШКЕК, 20-июн. — Sputnik. Алкоголь жана анын уулуу компоненттери канды коюулантат жана тромбдорду пайда кылат, бул кан тамырлардын бүтөлүшүнө жана карышуусуна түрткү берет.
Мындай эскертүүнү Республикалык ден соолукту чыңдоо борборунун адистери жасады.
"Ичимдик — жүрөк-кан тамыр ооруларын күчөткөн факторлордун бири. Жыл сайын дүйнө жүзүндө алкоголдон жана анын кесепетинен болжол менен 2,5 миллион адам көз жумат. Аталган илдеттен каза тапкандардын 14 пайызы алкоголь ичүү менен байланышкан", — деп айтылган анда.
Спирт ичимдиктерин ичкенде жүрөк мүнөтүнө 100гө чейин согот, кан айлануу ыргагынан чыгат, майда кан тамырлар карышат.
Спирт ичимдиктери организмде төмөнкү өзгөрүүлөрдү пайда кылат:
жүрөккө кошумча күч келип, күчөтүлгөн режимде иштейт да, адаттагы ыргагынан эки эсе көп кан айландырууга туура келет;
анын уулуу компоненттери жүрөк булчуңдарында майлардын топтолуусун жана жүрөктүн май дистрофиясынын өрчүшүн шарттайт;
кандын уюп кетүү ыктымалдыгы жогорулап, ал кан тамырлардын капталдарында холестерин бүртүкчөлөрүнүн пайда болуусуна жана атеросклероздун өрчүшүнө алып келет;
ичимдиктин жүрөккө таасир этиши артериялык кан басымды өзгөртөт. Алгач "жинди суу" кан тамырларды кеңейтет, андан кийин алар карышып улам ичкере баштайт. Кан тамырлардын узак убакытка чейин карышуусу артериялык кан басымдын жогорулашына алып келет. Ал эми бул гипертониялык оорунун өнүгүүсүнө себепчи болот же гипертониялык кризистердин пайда болуусуна түрткү берет;
ичимдик менен узак убакытка чейин "жолдош болуу" жүрөк ритминин бузулушу, кардиомиопатияны (жүрөк жетишсиздигине алып келүүчү жүрөк булчуңдарынын жабыркашы) пайда кылышы ыктымал. Инфаркттын келип чыгуу кооптуулугун жогорулатат. Жаш куракта (40 жашка чейин) инфаркт көп учурда ичимдиктен улам кармайт.
алкоголго кошуп тамеки чегүү, аз кыймылдоо, туура эмес тамактануу инфаркт, инсульт жана жүрөк-кан тамыр системасынын башка ооруларынын өрчүү коркунучун жогорулатат.
