Кусеинова: аттестациялоо аркылуу мугалимдердин айлыгына акча кошуу максатталууда
© Sputnik / Шабдан Абылгазы уулу
Жазылуу
Билим берүү жана илим министрлигинин мектеп, мектептен тышкаркы жана кошумча билим берүү башкармалыгынын башкы адиси Айнура Кусеинова мугалимдерди аттестациялоо тууралуу айтып берди.
Аттестациялоо аркылуу мугалимдерге стимул берүү максатталууда. Бул тууралуу Айнура Кусеинова Sputnik Кыргызстан радиосунда маек куруп жатып билдирди.
Кусеинова: аттестациялоо аркылуу мугалимдердин айлыгына акча кошуу максатталууда
Анын айтымында, аттестациялоодон мугалим өз каалоосу менен өтө алат.
"Мугалимдерди аттестациялоо — билим берүү сапатын жакшыртуучу, кесипкөйлүүлүгүн өстүрүп, аларды шыктандыруучу ыкмалардын бири. Ал өзгөчө форматта болуп, 17-февралда биринчи жолу өткөрүлдү. Педагогдор өз ыктыяры менен катышып, өзүн-өзү баалоо критерийлери боюнча баракчаны толтурат. Ага олимпиада, сынактардагы окуучуларынын жетишкендиктери дагы кирет. Ошондой эле мурдагыга салыштырмалуу мугалим алгач экинчи, анан биринчи, жогорку даражага тапшырбай, эгер тапшырган маалыматтары тууура келсе түз эле өзүн ылайык деп эсептеген категорияга өтсө болот. Аттестациялоодон адам фактору толугу менен алып салынды. Анткени өзү ылайык делген категорияны мугалим өзү тандайт, ал эми документтерди электрондук вариантта жөнөтөт. Мындан тышкары, тест тапшырып, жыйынтыгын дароо алат. Ийгиликтүү өткөндөрдүн маянасына 2000-5000 сомго чейин кошулат. Аттестация квартал сайын уюштурулуп турат. Алгачкы жолу болуп жаткандыктан мугалимдер айрым кемчиликтерди кетирип койгон учурлар бар. Алсак, бул жолкусунда 313 мугалим документ тапшырып, 57 мугалим тестирлөөгө уруксат алган. Жыйынтыгы боюнча бир мугалимге экинчи даража ыйгарылды", — деди Кусеинова.
Ошондой эле ал эгер мугалим тапшыра албай калса дагы аракет кылып көрүүгө мүмкүндүк бериле турганын кошумчалады.
