Бикулов: Нарын, Ысык-Көл жана Ошко инвестиция көп тартыла баштады
© Sputnik / Асылбек Бактыбеков
Жазылуу
Президентке караштуу Инвестициялар боюнча улуттук агенттиктин инвестиция тартуу жана аймактарды өнүктүрүү башкармалыгынын башчысы Дамирбек Бикулов быйыл октябрда Баткенде эл аралык экинчи инвестициялык форум өтөрүн айтты.
Инвесторлор ийгиликтүү иштейм десе долбоорун сапаттуу сунуштап, биринчи күндөн тарта жумушун так аткарышы абзел. Мурдагыдай бекинип отчеттуктарды жүргүзүү, каржылоо булактарын көрсөтпөө сыяктуу туура эмес иштерди жасоого жол берилбейт. Бул тууралуу Дамирбек Бикулов Sputnik Кыргызстан радиосунун эфиринде маек куруп жатып билдирди.
Бикулов: Нарын, Ысык-Көл жана Ошко инвестиция көп тартыла баштады
Анын айтымында, долбоорлордун сапатына басым жасалат.
"Октябрь айында Баткен облусунда эл аралык экинчи инвестициялык форум өткөрөлү деп пландап жатабыз. Баткенди алыскы аймак, ошол эле кезде инвестицияга муктаж болгону үчүн тандадык. Ар тараптуу долбоорлорду ишке ашырса болот. Алсак, тоо-кен, агросектор же текстиль тармагын өнүктүрүүгө мүмкүнчүлүк бар. Эң биринчи Баткендин инфраструктурасын жакшыртуу үчүн ишкерлер тараптан сунуш болгон. Биз да аларды колдодук. Бүгүнкү күндө курулуш материалдарын чыгаруучу өзгөчө завод курулуп жатат. Баткенге кирген акча кайра чыкпастан ичинен айланышы керек. Октябрь айындагы форум ийгиликтүү өтсө, анын алкагында бир нече долбоорго кол коюлуп, ишке ашат. Ал эми 27-майда Ысык-Көл облусундагы Каркыра тоо тармагын өнүктүрүү боюнча инвестициялык келишимге кол коюлду. Ал жерге кичи шаарча түшөт. Туризмге багытталган долбоордун артыкчылыгы Каркыра жайлоосунда лыжа комплекстеринин курулуп, ошол эле кезде спорт жана ден соолукту чыңдоо үчүн шарттардын түзүлүшүндө. COVID-19 окуясынан кийин ден соолукка байланыштуу долбоорлор өтө актуалдуу болуп жатат. Ысык-Көл облусу биосферарык аймак болгондуктан жабдуулар, курулуш материалдар экологиянын жана климатты сактоо талаптарына жооп берет. Ар бир аймакка өзүнүн деңгээлинде сунуштар келип жатат. Акыркы жылдары Ысык-Көл, Нарын жана Ош облустарына инвестиция көп чыгууда. Инвесторлор бардык аймакта иштөөгө даяр. Биз аларга каржылоо максатында сунуш айтып, жардам берип турабыз. Биздеги фонддордун каржылоосун бүгүнкү күндө ички инвесторлор колдонсо болот. Долбоор сапаттуу болушу шарт жана каржы маселесиндеги талаптарга жооп бериши керек", — деди Бикулов.
Ал ошондой эле өлкөдө акыркы эки-үч жылдан бери жакшы иштер аткарылып, ишкерлердин деңгээли өсүп жатканын кошумчалады.
