Депутат: бүтүрүүчүлөр 11-класста тапшырылчу экзамендерди жоюуну суранышууда
© Sputnik / Виталий Тимкив
/ Жазылуу
БИШКЕК, 5-фев. — Sputnik. Бүтүрүүчүлөр 11-класста тапшырылчу мамлекеттик экзамендер "эч нерсеге таасир этпестигин" айтып, аны жоюуну суранышууда. Бул тууралуу депутат Дастан Бекешев парламентте билдирди.
Эл өкүлү окуучулар менен ата-энелер билим берүү жаатында бир катар маселелерди көтөргөнүн белгиледи.
Алар төмөнкүлөр:
мектеп бүтүрүүчүлөрү ЖРТ тапшырып жатышат, алар кайсы ЖОЖго тапшырарын дагы тандап коюшкан, мамлекеттик экзамендер эч нерсеге деле таасир эте албайт;
ЖОЖ бүтүрүүчүлөрү дипломдорду сентябрь, октябрда эмес, жайдын башында берүүнү суранышууда. Алар чет жакка барып окуп, иштегендин ордуна дипломун күтүп калып жатышат;
мектептерде жана бакчаларда акча чогултууга тыюу салынган мыйзам кабыл алынган. Бирок анда ата-энелер балдардын тамак-ашын өз мойнуна алат деген жери да бар. Муну тактап коюу керек;
жасалма интеллектинин жардамы менен билим берүү алда канча батыраак болот, андыктан мектепте билим берүүнү 12 жылга созбой, тескерисинче, кыскартуу керек;
Бекешев президенттин парламенттеги өкүлү Алмасбек Абытовго бул суроолор боюнча министрликтен жооп алып, кат түрүндө жөнөтүп коюуну өтүндү.
