Sputnik Кыргызстан агенттиги окурмандардын суроосу менен жаңы өкмөт мүчөлөрү тууралуу факты даярдамакчы. Алгач биринчи вице-премьер Кубатбек Бороновдон баштадык.
Эмгек жолун таш тизип баштаган. Кесиби боюнча инженер-куруучу. 1991-жылы Фрунзе политехникалык институтунун Айыл чарба курулуш факультетин аяктап, эмгек жолун "Фрунзекурулуштун" СМУ-9 трестинде таш тизгич болуп баштаган. Кесиби боюнча иштеп жүрүп, жыгач иштетүүчү заводдун жетекчилигине чейин жеткен. Бирок СССР ураганда жумуш токтоп, бизнеске өтүп кеткен. "Үй-бүлөнү бакканга туура келген" деген министр достору менен пахта сатуучу чакан ишкана да ачкан. Бирок ишкерлик менен беш жыл гана алектенген.
15 жылдык өмүрүн алган ӨКМ. Биринчи вице-премьер ӨКМде алгач 2005-жылы жарандык коргонуунун шаардык башкармалыгынын жетекчисинин орун басары болуп иштей баштаган. Мекемедеги реформадан кийин ал кызмат жоюлуп, аймактар аралык башкармалыгында жетекчинин орун басары болуп калган. Улам бир тепкичке көтөрүлүп отуруп, 2011-жылы декабрь айынан баштап аталган министрликтин эки тизгин, бир чылбырын колго алган.
Ата-эне, бир туугандары. Биринчи вице-премьердин атасы учурда 83 жашта, апасы 82де. Министр өзү 8 бир тууган. Улуу агасы кырсыктап 2013-жылы дүйнө салган. Калгандары ар түрдүү тармакта иштеп келишет.
Үй-бүлөсү. Бир кыз, бир уулдун атасы. Баласы Эркин Боронов учурда Жогорку Кеңеште депутаттын жардамчысы болуп иштейт. Келини ЖКнын V чакырылышынын депутаты Замирбек Алымбековдун кызы. Ал эми өзүнүн кызы борбор калаадагы мектептердин биринде 4-класстын окуучусу.
Мүнөзү. ӨКМ кызматкерлеринин айтымында, Боронов жөнөкөй, карапайым адам. Ал ар бир кызматкерге бир тууганындай мамиле кылып, жыйналыштарда кокус катуу айтып алса, кайра ошол адамдын өзүн чакырып себебин түшүндүрчү экен. Түнкү саат 12лерге чейин жыйналыш өткөрүп, жаратылыш кырсыктарында дайыма катардагы кызматкерлеринин жанында жүрчү.
