БИШКЕК, 23-сен. — Sputnik. Президент Алмазбек Атамбаев Ысык-Көл облусуна жасаган иш сапарынын алкагында Бактуу-Долоноту айылындагы дене тарбия – саламаттык чыңдоо комплекси курула турган жерди көрүп чыкканын өлкө башчынын маалымат кызматы билдирди.
Объектти кыдыруу учурунда Архитектура, курулуш жана турак-жай чарба мамлекеттик агенттигинин директору Турдубек Мамбетов жалпы аянты 2 миң чарчы метрден ашуун келген үч кабаттуу дене тарбия – саламаттык сактоо комплексинин (ДСК) генпланынын долбоору менен тааныштырды.
Маалыматка ылайык, аталган имаратта Көчмөндөр цивилизациясынын борбору жайгашат.
"Андан соң президент Чолпон-Ата шаарындагы келерки жылы Дүйнөлүк көчмөндөрдүн экинчи оюндары өткөрүлө турган ипподромду көрүп, реконструкциялоо жана модернизациялоо боюнча тиешелүүү мамлекеттик органдардын жетекчилерине тапшырмаларды берди", — деп айтылат билдирүүдө.
Жыйынтыгында өлкө башчы эл аралык иш чаранын бийик деңгээлине жооп бериш үчүн курулуш жана ремонт иштерин алдын ала баштап, аларды белгиленген мөөнөттө жана мыкты сапатта аткаруу боюнча тапшырма берди.
