БИШКЕК, 2-ноя. — Sputnik. Борбор калаанын Гагарин жана Садырбаев (мурунку Бах — ред.) көчөлөрүнүн кесилишинде үч унаа кагышкан жол кырсыгы болгонун Sputnik Кыргызста агенттигине окуянын күбөсү билдирди.
Анын айтымында, кырсык болжол менен саат 11.00дө болгон. Volkswagen Golf, HOWO, Sprinter унаалары кагышкан сүрөттө машиналардын катуу жабыркаганын көрүүгө болот.
"Биринчи кырсык Түштүк магистралынан төмөн Бах көчөсүндө болгон. Жүк ташуучу унаа бир жеңил машинаны жөөлөп кеткенден кийин ары барып Гагариндеги унааны сүзүп салган. Окуядан жабыркагандар болушу мүмкүн. Жүк ташуучу унаанын айдоочусу кырсык болгон жерден кетип калган. Машинанын тормозу иштебей калышы ыктымал. Аталган жерге милиция менен Тез жардам кызматы келди", — деди күбө.
Милиция жол кырсыгы болгонун тастыктады, ушу тапта окуянын чоо-жайы иликтенип жатат.
