БИШКЕК, 21-авг. — Sputnik. Президент Садыр Жапаров бүгүн, 21-августта, Ысык-Көл облусуна болгон иш сапарынын алкагында Балыкчы — Барскоон тилкесиндеги оңдоп-түзөө иштери менен таанышты.
Мамлекет башчысына 2021-2025-жылдарда Балыкчы — Бөкөнбаев — Барскоон жол тилкесин реконструкциялоо боюнча иштерди жүргүзүү нөлдөн 141,7 чакырымга чейин пландалганын маалымдашты. Калк жайгашкан пунктуларда жарыктандыруусу, бир жак бетинде жол бою веложолу менен жана эки тарабында жөө адамдар жүрчү жолу бар, бөлүүчү чийиндери менен төрт тилкелүү жолду куруу пландалууда. Быйыл 25 чакырым жол тилкесинде курулуш иштери жүрөт.
Долбоор "Кыргыз алтын" ачык акционердик коому тарабынан каржыланат.
Өзгөчө белгилей кетүүчү нерсе, эгемендүү Кыргызстандын тарыхында биринчи жолу долбоорго ата мекендик компания — Кыргыз Республикасынын Жолчулар ассоциациясы подрядчы болууда.
Мамлекет башчы автоунаалардын үзгүлтүксүз, коопсуз жана ыңгайлуу кыймылын камсыздоо максатында бардык заманбап стандарттарга ылайык, талаптарга жооп бере турган кең тилкелүү жана сапаттуу жол куруу зарылдыгына токтолду.
Өз кезегинде компаниянын кызматкерлери бул маанилүү долбоорго катышып жатканына кубанычта болуп, сыймыктанаарын билдиришти. Иш башталгандан бери эч кандай көйгөй жаралган эмес. Андыктан бардык курулуш иш-чаралары белгиленген мөөнөттөн кечикпей жүрүүдө.
Эске салсак, Садыр Жапаров ушул жылдын июнь айында "Кумтөр Голд Компани" ЖАКы алтын кенине барган учурда өлкөнүн Транспорт жана коммуникациялар министрлигине "Кумтөр Голд Компани" ЖАКы менен биргеликте Балыкчы — Барскоон автожолун куруу маселесин иштеп чыгууну тапшырган.
