БИШКЕК, 7-авг. — Sputnik. BMW 5 үлгүсүндөгү автоунаа менен бус сүзүшүп, жол кырсыгынан жеңил автомашинанын айдоочусу каза болгондугун Sputnik Кыргызстан агенттигинин WhatsApp-каналы аркылуу күбө билдирди.
Кырсык тууралуу маалыматты Чүй ОИИБдин Кайгуул милиция башкармалыгы тастыктады.
"Окуя жекшемби күнү саат 19:00дө болгон. Анда BMW унаасынын айдоочусу рулду башкара албай жолдун каршы тилкесине чыгып, жүргүнчү ташыган № 378 кичиавтобусту сүзгөн. Окуя болгон жерде жеңил автомашинанын айдоочусу көз жуумп, 13 жүргүнчү жаракат алган. Алардын арасында төрт жашы жете элек балдар болгон", — дешти башкармалыктан.
Кырсык боюнча учурда тиешелүү экспертиза дайындалды.
Эгер кандайдыр бир кызыктуу окуяларга туш болуп калсаңыз тарткан сүрөт, видеолорду биздин +996 706 566 544 WhatsApp же Telegram номери аркылуу билдирсеңиз болот.
