БИШКЕК, 10 июнь — Sputnik. Президент Алмазбек Атамбаев Ош жана Жалал-Абад облустарындагы калк туруктуу отурукташкан төрт жерге айыл статусун ыйгарган мыйзамга кол койду деп билдирет өлкө башчынын маалымат кызматы.
Мыйзам Жогорку Кеңеш тарабынан 2015-жылдын 6-майында кабыл алынган.
"Мыйзамдын негизги максаты – калк жашаган чакан аймактарда ыңгайлуу шарт түзүп берүү. Ал ички миграциянын өсүшүн токтотууга жана мамлекеттин административдик-аймактык түзүлүшүн иретке келтирүүгө багытталган", — деп айтылат билдирүүдө.
Айыл статусуна ээ болгон калктуу пункттар:
- Жалал-Абад облусунун Ала-Бука районундагы Төрөгелди Балтагулов айыл аймагынын Кажар аттуу калк отурукташкан жери;
- Жалал-Абад облусунун Аксы районундагы Мавлянов айыл аймагынын Таш-Жар жана Жаңгак аттуу калк отурукташкан жерлери;
- Ош облусунун Өзгөн районундагы Жалпак-Таш айыл аймагынын Кара-Тарык аттуу кал отурукташкан жери.
Мыйзам расмий жарыялангандан кийин он күн аралыгында күчүнө кирет.
