БИШКЕК, 20-мар. — Sputnik. Учак кыйраганда каза болгон кыргызстандык стюардесса Жылдыз Насирдинованын туугандары анын сөөгүн таануу үчүн Москвага келип, бүгүн эртең менен КР вице-консулунун коштоосунда кырсык болгон Ростов-на-Дону шаарына жөнөп кетишти. Бул тууралуу КР ТИМнин расмий өкүлү Нурлан Сүйөркулов билдирди.
28 жаштагы Насирдинова Flydubai авиакомапаниясында беш жылдан бери иштеп, Boeing 737-800 учагындагы экипаждын курамында болчу.
“Сөөктү таанууга Жылдыз Насирдинованын атасынын бир тууганы менен өзүнүн агасы келди. Учурда алар вице-консулдун коштоосунда Ростовго карай жолдо бара жатышат. Ал жактан дароо аэропортто иштеп жаткан штабга барып, авиакомпаниянын өкүлдөрү менен жолугушат”, — деди Сүйөркулов.
Fly Dubai авиакомпаниясы 2009-жылы Дубайдын өкмөтү тарабынан негизделген. Учактары 90 багытка, анын ичинен Бишкекке да каттайт.
