Мюнхенде 9 кишини өлтүргөн жаран 18 жаштагы ирандык экени аныкталган

БИШКЕК, 23-июл. — Sputnik. Германиянын Мюнхен шаарындагы "Олимпия" соода борборундагы куралдуу кол салуудан 9 киши каза болуп, 16 киши түрдүү жаракаттар менен ооруканага жеткирилди. Полициянын маалыматына ылайык, ок чыгарган жаран 18 жаштагы түбү ирандык бала болгон. Ал эмне себептен мындай ишке барганы азырынча тактала элек.

Буга чейин атышуудан 15 киши каза болгону айтылып, бирок кийин ал такталган эмес. Ошондой эле Мюнхендеги ок атуудан кийин шаардын башка аймактарында дагы атышуу болгону маалымдалган. Бирок, полиция алар такталбаганын билдирди.

​Алдын ала маалыматтар боюнча башкаларга ок чыгаргандан кийин ал өзүн аткан.

Буга чейин, мындан бир нече күн мурда Вюрцбург шаарынан алыс эмес жерде Афганистандын тургуну поезддин жүргүнчүлөрүнө кол салган. Анын кесепетинен беш киши жабыркаган.

Бул окуя Тройхтлинген станциясынан Вюрцбургга бараткан поездде болгон. Полициянын маалыматына ылайык, вагондо 14 киши бара жаткан. Кол салган Афганистандын тургуну 17 жашта экени айтылууда.

Die Welt басылмасы жергиликтүү полицияга таянуу менен кол салган киши "Аллах акбар" деп кыйкырганын маалымдады.Кол салгандан кийин ал поездди токтотууга аракет кылып, окуя болгон жерден из жашырууну көздөгөн. Бирок, кырсык болгон жерге келген атайын даярдыктагы аскерлер аны жок кылышкан.