Жогорку даражалуу меймандарды тосуу үчүн "Ала-Арча" мамелкеттик резиденциясында конок үйү салынды. Анын курулушу февраль айында башталып, 20-августка соңуна чыккан. Имарат сыртынан боз үйдүн элесин берип турат.
Президенттин иш башкармалыгынын жетекчиси Туруспек Коеналиев журналисттер үчүн атайын экскурсия өткөрүп, саммиттин алкагында делегация башчылары коноктоло турган жайларды көрсөттү. Эки кабат имараттын жалпы аянты 1,5 миң чарчы метр.
"Бул жерде төрт иштөө бөлмөсү бар. Андан сырткары, ашкана, башкаруу борбору, кийим коюучу жай бар. Бул конок үй атактуу мейманканалардагы президенттик люкс номерлерден кем калышпайт", — деди ал.
Коеналиев президенттердин табитин эске алуу менен меню даярдалганын, алардын катарында сыра да бар экенин кошумчалады.
Саммитке Армения, Азербайжан, Белоруссия, Казакстан, Россия жана Тажикстандын өлкө башчылары келерин тастыктаган. Түркмөнстандын атынан өкмөт башчынын орун басары келмей болду. Ал эми Молдованын премьер-министри жана Украинанын элчиси келсе, Өзбекстандын атынан өлкөнүн тышкы иштер министри катышат.
