БИШКЕК, 28-мар. — Sputnik. Индия менен Араб Эмираттарынын бир катар жалпыга маалымдоо каражаттарында (ЖМК) аравиялык бизнесмен Кыргызстандын куралдуу күчтөрүнөн генерал деген наам алды делген маалымат боюнча ызы-чуу чыкканын Outlook India журналы жазып чыкты.
Макала "Индиялык бизнесмен Кыргызстандын Куралдуу күчтөрүн жетектегендердин катарын толуктады" деген аталышта жарык көргөн. Анда бизнесмен Кыргызстандын Коргоо комитетинин жетекчисинин колунан "генерал-майор" наамын алганы жазылган.
ЖМКдагы маалыматтарга караганда, наам 31-декабрь күнү Бишкекте расмий түрдө тапшырылган. Ошондой эле гезитте индиялык ишкер чет өлкөнүн аскер структурасында жогорку кызматты ээлеген алгачкы учур экени белгиленген.
Кийинчерээк алардын материалы индиялык басылмалардын "талоонунда" калган. Жаңылыктарды Hindustan Times жана Business Standard сыяктуу абройлуу басылмалар чыгарып, алдыңкы телеканалдар аскер кийимчен турган ишкердин өзүн да тартып алышкан.
Видеорепортажда ал аскердик макам өлкө өнүгүүсүнө кошкон салымы үчүн берилгенин айтат.
Андан соң бул маалымат Кыргызстандын Бириккен Араб эмирлигиндеги дипломатиялык өкүлчүлүгү тарабынан жокко чыгарылган. Кыргызстандын элчиси Чыңгыз Эшимбеков жергиликтүү гезитке кайрылып, ири резонанс жараткан жаңылыкты оңдоп чыгарууну талап кылган.
"Такталган маалымат боюнча Шейх Мухаммед Рафик биздин өлкөдө эч кандай аскердик наам алган эмес. Khaleej Times басылмасынын кабарчысы такталбаган булактарга таянып, жаңылыкты текшерип чыккан эмес шекилдүү", — деп айтылат элчинин расмий кайрылуусунда.
Remember that @khaleejtimes story on a 5th class dropout Malayali becoming a Major General in Kyrgyzstan?FAKE! https://t.co/BRkgYLkIBD pic.twitter.com/6RTWRZKQY6
— Nikhil Narayanan (@nikhilnarayanan) 9 марта 2017 г.
Жаңылык жокко чыгарылганы менен ишкер "наам алгам" деген сөзүнөн кайткан эмес.
"Мага наамды коргоо министри өзү тапшырды. Билишимче, Коргоо жана Тышкы иштер министрликтеринин ортосунда өз ара пикир келишпестик өкүм сүрөт. Элчиликтин кайрылуусуна мына ушул түшүнбөстүк себеп болуп жатат. Маселе жакынкы аралыкта чечилет", — деди индиялык магнат.
Sputnik Кыргызстан агенттиги Шейх Мухаммед Рафиктин өзү менен тилекке каршы, байланыша алган жок.
Ал эми Кыргызстандын Генералдык штабынын маалымат кызматынын жетекчиси Майрамбек Мусиев "генерал-майор" деген офицерлик жогорку наам бир дагы чет элдик жаранга ыйгарылбаганын билдирди.
"Мындан тышкары, мыйзам боюнча расмий кызматтагылардын чет элдиктерге аскердик наам берүү укугу жок", — деди ал.
