Боз үй, тай казан... Сауд Аравиядагы кыргыз айылы жана ипподромдун видеосу

БИШКЕК, 7-мар. — Sputnik. Camel fest фестивалына Кыргызстандан топоз, тайган, бүркүттөрдү алып кетишкен. Алар ачылыш жана жабылуу аземдерине катышары күтүлүүдө. Мындан сырткары, "Көчмөндөр ааламы" деп аталган этнофестиваль көрсөтүшөт.

Дүйнөлүк этнооюндар конфедерациясы Эр-Риядда курулган көчмөндөр айылынын видеосун жарыялады. Андан катар тизилген боз үйлөрдү жана көчмөндөр айылынын кире беришиндеги дарбазанын курулуп жатканын көрүүгө болот.

Айылдын ичине көчмөндөрдүн жашоосун чагылдырган чакан эстеликтер тургузулган. Ал эми ак илбирстин, төөнүн, бүркүттүн жана калпактын фигуралары кумдан жасалган.

Camel fest этнофестивалында кыргызстандык 50 улакчы беш командага бөлүнүп, көргөзмө оюн тартуулайт. Талас, Ысык-Көл, Чүй, Ош облустарынан бирден команда жана Баткен, Жалал-Абад, Нарын, Бишкек менен Ош шаарларынан экиден улакчы тандалып бир команда түзүлгөн. Жалпы жонунан айтканда оюнчулар Кыргызстандын бардык дубанынан барган.

Алгач аргымактарды да Кыргызстандан алып баруу пландалган, кийинчерээк айрым маселелерден улам аттар Сауд Аравиядан алына турган болгон.

Бул кыргыз улакчылары ошол жактан алган аттарын минип көрүп, көк бөрүгө үйрөтүп жаткан учуру.

Фестивалдын алкагында кыргыз көк бөрүчүлөрү үчүн атайын ипподром курулган. Ал жерге ушундай тай казанды орнотушкан.

Эскерте кетсек, Camel Fest фестивалы 9-мартта башталып 23үнө чейин созулат. Анда 98 мамлекеттин өкүлдөрү маданият жана спорт жаатында талантын көрсөтөт. Ага катышууга кыргызстандыктарга эң көп — 2000дей квота бөлүнсө, башка мамлекеттерге 15-20дай адамга чакыруу жиберилген. Катышуучулардын тамак-ашы, жаткан жери беленделип, мал-жаны багылуу болот. Кеткен чыгымдын баарын уюштуруучулар көтөрмөкчү.