БИШКЕК, 17-июн. — Sputnik. Кубатбек Бороновго премьер-министрдин милдетин аткаруу жүктөлдү. Бул туурасында мамлекет башчынын маалымат кызматынан кабарлашты.
"Президент Сооронбай Жээнбеков кол койгон Жарлыкка ылайык, премьер-министрдин биринчи орун басарынын милдетин аткаруучу Бороновго өкмөттүн жаңы курамы түзүлгөнгө чейин премьер-министрдин милдетин аткаруу жүктөлдү", — деп жазылган маалыматта.
Кечээ, 16-июнда, парламенттеги көпчүлүк коалиция Бороновдун талапкерлигин өкмөт башчылыгына карап, колдогон. Бүгүн анын талапкерлигин Жогорку Кеңештин карай турганы күтүлүүдө.
Ушул эле Жарлык менен Мухаммедкалый Абылгазиев берген арызына ылайык премьер-министринин милдетин аткаруудан бошотулган.
