Быйыл пенсиянын камсыздандыруу бөлүгү 38%га жогорулайт
© Sputnik / Асель Сыдыкова
Жазылуу
Социалдык фонддун пенсиялык жана тарифтик саясат башкармалыгынын башчысы Жылдыз Кулжанова пенсия көтөрүлгөндө акча индексациянын негизинде анын камсыздандыруу бөлүгүнө кошуларын айтты.
Пенсияны жогорулатарда Улуттук статистика комитетинин маалыматтары каралат. Алар инфляциянын деңгээли, орточо айлык акы боюнча жылдык маалымат таратышат. Ошонун негизинде быйыл пенсиянын камсыздандыруу бөлүгүн 26 пайызга көтөрүү керек болчу. Бирок Социалдык фонддун мүмкүнчүлүктөрү бар болгондуктан 38 пайызга жогорулатылып жатат. Бул тууралуу Жылдыз Кулжанова Sputnik Кыргызстан радиосуна маек куруп жатып билдирди.
Быйыл пенсиянын камсыздандыруу бөлүгү 38%га жогорулайт
Анын айтымында, Кыргызстанда пенсия жыл сайын жогорулатылып келет.
"Ар жыл сайын өлкөдө пенсия жогорулайт, башкача айтканда, индексация жүргүзүп турабыз. Быйыл да карыялар октябрь айынын пенсиясын көтөрүлгөн тариф менен алышат. Пенсия кандайча жогорулайт? Биз анын камсыздандыруу бөлүгүнө кошобуз. Анткени базалык бөлүгү орточо айлык акынын 12 пайызында кармалып турушу керек, азыр бул норма сакталып 3 170 сомду түзөт. Улгайганда жакшы пенсия алууну каалап, камсыздандыруу бөлүгүнө дайыма каражат которуп жүргөндөр кийин да көп суммада пенсия алгысы келет. Бул акыйкат каалоо деп ойлойм. Андыктан Социалдык фонд пенсиянын камсыздандыруу бөлүгүн өлкөдөгү инфляция деңгээли, орточо айлык акыга карап эсептеп чыгып, көтөрөт. Бирок айрымдар бир-эки эле жыл эмгектенип, камсыздандыруу бөлүгүнө өтө эле аз акча которгон болуп чыгат. Мындай учурда камсыздандыруу бөлүгү болгону 100 сомду түзүшү ыктымал, анда биз ага 38 гана сом кошушубуз керек болот. Бирок Социалдык фонд мындай жарандарга кеминде 500 сом кошуп берет. Мындан ары да, мыйзамга ылайык, пенсиянын камсыздандыруу бөлүгү гана жогорулайт. 2017-жылга чейин пенсиялар ар кандай эрежеде көтөрүлчү. Алты жылдан бери биз ким келечегин ойлоп Социалдык фондго туруктуу акча которуп турган болсо, ошолордун пенсиясы татыктуу болсун деген макстатта пенсиянын камсыздандыруу бөлүгүн жогорулатып келебиз", — деди Кулжанова.
Ал быйыл орточо эсеп менен пенсия 1 728 сомго жогорулаарын, бул үчүн 3,9 миллиард сом керектелерин кошумчалады.
