Садыр Жапаров Акаевдин экс-президент макамын кайтаруу өтүнүчү боюнча үн катты
23:47 05.09.2024 (Жаңыртылды: 10:01 06.09.2024)
Жазылуу
Жапаров Курманбек Бакиев менен Алмазбек Атамбаевге салыштырмалуу Акаевге кылмыш иши козголбогонун жана издөө жарыяланбаганын белгилеген.
БИШКЕК, 5-сен. — Sputnik. Өлкө башчы Садыр Жапаров Аскар Акаевдин экс-президент статусун калыбына келтирүү үчүн Жогорку Кеңешке жазган каты боюнча "Кабар" агенттигине маек курду.
Президент Акаевге бул макамды берүү маселесин Жогорку Кеңеш гана чечерин айтып, бирок Курманбек Бакиев менен Алмазбек Атамбаевге салыштырмалуу ага кылмыш иши козголбогонун, издөө жарыяланбаганын белгилеп кеткен.
Садыр Жапаровдун маегинен урунттуу учурлар:
Аскар Акаевди Кумтөр боюнча суракка келгенде эки жолу көрдүм. Андан кийин Дубайда мурдагы президенттерди чогултканда үчүнчү жолу көрүштүм. Андан бери көрүшкөн да, сүйлөшкөн да жокмун. Бул маселе боюнча кеңешкен эмеспиз;
экс-президент макамын алыш дагы, бериш дагы Жогорку Кеңешке таандык. Мен көз карашымды айта албаймын. Жогорку Кеңеш өзү билсин. Мыйзамдуу жагын карап көрүшсүн;
Бакиев менен Атамбаевдин жагдайы Акаевдикинен айырмаланып турат. Бакиев менен Атамбаевдин иштеринде адам өлүмү менен коштолгон жагдайлар болуп кетти. Аларга парламент экс-президент макамын берсе туура эмес болуп калат го деп ойлойм;
Акаев качканда адам өлүмү менен коштолгон эмес, кылмыш иши козголгон эмес, издөө жарыяланган эмес. Албетте, Акаевдин башкаруу мезгилинде чоң кемчиликтер кеткен. Ошону менен бирге жаңы эгемендик алган мезгилдерде жетишкендиктери да болгон;
Акаев тарыхта экс-президент болуп атым калсын деген ой менен арыз берди окшойт. Ал киши 80 жашка чыкты. "Өсөрү калган жок, өлөрү калды" дейт эмеспи. Аны пенсия, күзөт жана башкалар кызыктырбайт го деп ойлойм.
Эске салсак, Кыргызстандын туңгуч президенти Аскар Акаев экс-президент статусун калыбына келтирүү өтүнүчү менен Жогорку Кеңешке кат жолдогон.
