Жаналиева: 152 млн. сомго мектептерди китеп менен камсыздоо мүмкүн эмес
© Sputnik / Кенжебай Сатканалиев
Жазылуу
"Учкун" ААКнын басмага даярдоо бөлүмүнүн башчысы Нуржамал Жаналиева окуу китебин басып чыгаруу иши жана китептеги каталар тууралуу айтты.
"Учкун" басмаканасынын бир жылда эки миллиард сомго чейинки буйрутманы басып чыгууга мүмкүнчүлүгү бар. Бул тууралуу Нуржамал Жаналиева Sputnik Кыргызстан радиосуна маек куруп жатып билдирди.
Жаналиева: 152 млн. сомго мектептерди китеп менен камсыздоо мүмкүн эмес
Анын айтымында, президенттин колдоосу менен "Учкун" басмаканасынын техникалык базасы мыкты чыңдалган.
"Былтыр "Учкун" басмаканасына министрлик тарабынан 152 миллион сом бөлүнгөн. Ага 737 миң окуу китебин басып, мектептерди камсыздык. Бул беш келишимдин негизинде басылган китептер. Аларга алиппе, диндердин өнүгүү тарыхы, физика жана информатика китептери кирет. Ал китептер аймактарда окуган орто класстын балдары үчүн өз убагында жеткирилди. Мындан да көп китеп басып чыгарууга даярбыз. Жогоруда бөлүнгөн 152 миллион сом менен республиканын мектептерин толук жабдуу мүмкүн эмес. Биз министрлик берген каражаттын негизинде мамлекеттик буйрукту гана аткара алабыз. Ал эми окуу китебиндеги каталар боюнча айтсак, бизге авторлордун кол жазмасы министрликтин экспертизасынан өтүп анан келет. Басмаканада да бир канча жолу окулат, текшерилет. Бизде да дасыккан адистер бар. Жеке басмаканада басылган же кантрофактылык жол менен келген китептерди көтөрүп чыгып деле "Учкун" басма үйүнөн чыккан" деп жатышат. Былтыртан бери министрлик менен 11 келишим түзүлдү. Бизден чыккан китептердин арасында андай чоң маселе жарала элек. Каталар боюнча министрлик да, биз дагы чогуу иштешип, болушунча көзөмөлдөп жатабыз", — деди Жаналиева.
Ал басмаканада учурда аттестаттар, күбөлүктөр, дипломдор басылып чыгарыларын кошумчалады.
