Эр-Рияддагы россия-америка сүйлөшүүсү. Тараптардын маанилүү билдирүүлөрү
21:09 18.02.2025 (Жаңыртылды: 17:00 19.02.2025)
Жазылуу
БИШКЕК, 18-фев. — Sputnik. Бүгүн Эр-Риядда Россия менен АКШ делегацияларынын сүйлөшүүсү болуп, Россия тараптан ага ТИМ башчысы Сергей Лавров менен президенттин жардамчысы Юрий Ушаков катышты. Ал эми АКШ тараптан мамлекеттик катчы Марко Рубио, президенттин улуттук коопсуздук боюнча жардамчысы Майк Вальц жана Жакынкы Чыгыш боюнча атайын өкүл Стивен Виткофф болду.
Сүйлөшүүнү Сауд Арабия уюштуруп, аталган мамлекеттин өкүлдөрү да баарлашуу столунда отурушту. РИА Новости билдиргендей, жолугушуу 4,5 саатка созулган.
РФ ТИМ башчысы токтолгон маселелер:
Россия менен АКШ геосаясий чөйрөдө жана экономикалык иштерде күч-аракеттерди бириктирүү үчүн бардыгын жасоо керектигин макулдашты;
Америка тарап Россиянын позициясын жакшыраак уга баштады деп айтууга негиз бар;
Россия менен АКШ кызыкчылыктар дал келбей калса да чыр-чатакты курчутпастан көйгөйлөрдү чечүү керектигин макулдашты;
Россия менен АКШнын кызматташтыгы толугу менен жанданышы үчүн шарттарды түзүү боюнча АКШ менен макулдашууга жетишилди;
Жакын арада элчиликтердин ишиндеги көйгөйлөрдү жоюу жана Москва менен Вашингтонго элчилерди тез арада дайындоону камсыз кылуу макулдашылды;
Россия менен АКШнын Украина боюнча консультациялары эки тарап тең сүйлөшүү топторун дайындагандан кийин үзгүлтүксүз болуп турат.
АКШнын мамкатчысы Марко Рубионун айткандары:
Украинадагы жаңжалды токтотуу үчүн бардык тарап эпке келиши керек;
Трамп Украинадагы чыр-чатакты адилеттүү бүтүрүүнү, 2-3 жылдан кийин кайра жанданышына жол берилбешин каалайт;
Евробиримдик Россияга каршы санкцияларды киргизгендиктен кайсы бир учурда сүйлөшүүгө катышуусу керек;
Украина жаңжалы жөнгө салынса Батыш Россияга каршы санкцияларды алышы керек болот;
Украинадагы жаңжалдын аякташы Россия менен АКШнын экономика жана геосаясат жаатында кызматташуусуна жол ачат.
